Mas ginpahugtan ang seguridad sa Sum-ag National High School sa Brgy Sum-ag, Bacolod City matapos ginbuno sang Grade 7 student ang Grade 8 student sa gwa sang eskwelahan sang Lunes sang hapon, Hunyo 29.
Sa interview sang Bombo Radyo kay Police Capt Greeky Cayao, station commander sang Bacolod Police Station 9, may gin-deploy nga personnel kag may police patrol nga nagahatag sang seguridad sa eskwelahan.
Suno kay Cayao, ang mga police ang nagabantay sa gwa sang eskwelahan halin sa pag-umpisa sang klase tubtob nga magbuhi.
Madumduman nga padayon nga ginabulong ang biktima nga Grade 8 student nga naga-edad sang 14, samtang ang suspect naman ang naga-edad sang 12.
Pahayag ni Cayao, nga may nagluntad nga komosyon sa gwa sang eskwelahan kag sa tunga sang kinagamo, may napudyot ang suspek nga matalom nga butang nga gingamit sini sa pagbuno sa biktima.
Nag-agom sang igo sa nawala nga kamot kag nawala nga bahin sang lawas ang biktima samtang gilayon naman nga nalagyo ang suspek bangod sa kakulba, apang nagsungka man sa Bacolod Police Station 9 kaupod sang utod sini nga babayi.
