“Kasaysayan, Kalayaan, Kahilwayan,” ini ang tatlo ka tinaga nga gingamit ni Negros Occidental Governor Eugenio Jose “Bong” Lacson sa laragway sang ika-128 nga adlaw sang kahilwayan ukon Independence Day.
Sa speech ni Lacson sa selebrasyon nga ginpatigayon sa Negros Occidental Provincial Capitol Lagoon, dapat nga dumdumon ang sakripisyo kag pagpakigbato sang mga Pilipino sadto agud makuha ang kahilwayan nga gina-enjoy sang karun nga henerasyon.
Suno sa gobernador ang sense of duty, patriotismo, kag commitment sa pungsod ang dapat nga makita tubtob sa karun.
Pinaagi sa ila nga pagsakripisyo, kita ang nahatagan indi lamang sang kinamatarong sa politika, kasubong man sang oportunidad nga magkabuhi nga may dignidad.
Nahatagan man ang karun nga henerasyon sang access sa edukasyon, healthcare, kag hustisya.
Pahayag sini nga responsibilidad sang kada henerasyon nga maghimo man sang mga butang nga para sa kaayuhan sang kabuhi sang mga Pilipino.
Kaangay sa nangin pundasyon nga naghuman sa pungsod, panawagan ni Lacson nga mag-invest sa pagbulig sa kabataan kag itudlo sa ila ang nagakaigo nga ideals, padulong sa “no one is left behind” nga Pilipinas.
Ginapasalamatan man sang gobernador ang serbisyo sang mga kapulisan, suldado, manunudlo, government workers kag private sector workers.
Suno diri, indi lamang paagi sa extra-ordinary act makonsiderar nga baganihan, kasubong man ang nagahipos lamang apang may-ara sang commitment sa pagserbisyo.; Sa mensahe ni Bacolod City Mayor Greg Gasataya sa pagdumdum sang ika-128 ka tuig nga Independence Day subong nga adlaw sa Bacolod City Government Center, ginpaathag sini nga sa tagsa ka kahigayunan sa paghatag sang matuod nga pagpamuno, mas ginpabaskog naton ang aton kahilwayan.
Suno kay Mayor Greg, nahilway ang ciudad paagi sa pagsikway sang tingog nga nagatuga sang pagbinahin-bahin kag kaakig.
Kita ang nahatagan man sang kahilwayan nga magpili sang aton nga banas kag makabuligay para sa mas maayu nga bwas damlag.
Nagapati si Mayor Greg nga ang pinangabudlayan kag ang pagtinguha apisar sa mga kabudlayan nga ginhimo sang mga Pilipino sadto, ang makita gihapon sa mga kabataan sa karun nga panahon.
Ginhalimbawa sini si Brianna Nikola Ang kun sa diin sa iya nga pagtapak sa court dala sini ang legasiya sang mag rebolusyonaryo sadto nga wala naga-surrender.
Ang determinasyon sini sa sport ang nagapakita nga ang pagdala sa hayahay sa karun ang nagakinahanglan gihapon sang mapag-on nga disiplina kag mabakod nga tagipusuon.
Kaangay sa pagmartsa sang mga rebolusyonaryo sang 1898, ang kadalag-an ni Brianna ang nagapakita man sang importansya sang disiplina.
Wala sang champion nga makalab-ot sa finish line nga sa iya lamang kaugalingon bangud ang kada medalya ang tuga sang pag-ubay sang mga coaches kag ginikanan.Samtang, ginpanawagan sang alkalde sa ciudad sang Bacolod subong nga ginasaulog ang 128th Independence Day, nga hatagan sang kahigayunan kag oportunidad ang mga pamatan-on.
Sa interview sang Bombo Radyo Bacolod kay Bacolod City Mayor Greg Gasataya, bilang gamay nga pagbag-o sa nakaandan nga focus sa pagselebrar sang Independence Day, ang ciudad ang naghatag naman sang oportunidad sa mga pamatan-on nga Bacolodnon.
Pahayag sang alkalde nga ang pagselebrar sang kahilwayan ang para sa tanan nga henerasyon.
Suno diri, tanan nga henerasyon ang dapat mahatagan sang tyansa nga mapakita kun ano ang ila nga ginarepresentar, apisar sa pag-atubang sang mga pagpanghangkat kag sa pagsakripisyo.
Pahayag ni Mayor Greg nga ang kaangay nga mga tikang ang nagapakita sang matuod-tuod nga kahilwayan ukon freedom.
