Dayunon gihapon sang Punong Barangay sa Barangay 29, Bacolod City ang tatlo ka adlaw nga pagsaulog sang ila kapiestahan apisar sa nagluntad nga sunog sa Purok Paghidaet kahapon sang hapon.
Sa interview sang Bombo Radyo Bacolod kay Punong Barangay Leonard Pascua, dako ang pagpasalamat sini sa prinsipal sang Apolinario Mabini Elementary School sa Barangay 28, sa pagpagamit sang eskwelahan bilang evacuation center.
Apisar sa natabo, nagapanindugan si Pascua nga dayunon niya ang iban pa nga mga programa sa kapiestahan nga nakaschedule Disyembre 26 tubtob28.
Paathag sini nga tanan nga mga aktibidad ang ginbayaran na sini antes paman ang programa gani makanugon sa kwarta nga ginpagwa sang Barangay.
Igaduso sini sa Barangay council nga mapadayun ang programa, bangod aminado ini nga may iban nga pumuluyo sa Barangay nga wala na-ulamid kag luyag pa nga magselebrar.
Sa pihak sina, sila ang nagapakig-unong man sa mga biktima sang sunog.
Aminado si Pascua nga ini ang dako nga pagpanghangkat para sa iya bilang isa ka panibag-o nga Punong Barangay, apang nagapati ini nga ang kaangay nga mga trahedya ang makabulig sa iya pagtubo.
Ginatinguhaan man sini nga mabalanse sa karun ang iya serbisyo para sa mga naapektuhan sang sunog subong man sa mga indi apektado./
Ginpasalamatan man sini ang Bacolod City Disaster Risk and Reduction Management Council (CDRRMO) sa madasig nga pagpalab-ot sang bulig.
Pahayag ni Pascua nga drained na ang budget sang Barangay gani ginapangitaan gid sini sang iban nga mga pamaagi agud nga mabuligan ang mga apektado nga residente.
Mahimo nga maabtan man sa New Year’s Eve nga yara sa evacuation center ang mga biktima, gani pasalig sini nga siya ang maka-upod nila.
Paathag ni Pascua nga indi mga illegal settlers ang mga nasunugan bangod titulado ang ila mga duta.
Aminado ang Punong Barangay nga aksidente ang natabo kag wala sang dapat basulon, apang pahanumdom sini nga dapat mangin mahinalungon partikular na sa mga butang nga sarang makatuga sang sunog.
Samtang panawagan man sini nga magbuligay sa kaangay nga sitwasyon.
