Suguran na sa Lunes, Marso 3 ang seminars kag trainings sang mga manunudlo nga makigbahin sa 2025 Midterm Elections.
Sa interview sang Bombo Radyo Bacolod kay Bacolod City Election Officer Atty Revo Sorbito, ang seminars kag trainings ang matapos sa Marso 27 kag partisiparan sang mga magaserbe nga Electoral Board, DepEd Supervising Official, Support Staff kag Board of Canvassers.
Una na nga naka-abot sa Bacolod City ang mga ballot boxes nakaligad nga semana, kag ini ang yara sa kustodiya sang City Treasurer’s Office.
Apang wala pa sa karun sang update kun san-o maabot ang mga gamiton nga Automatic Counting Machines (ACMs).
Magasugod naman ang final testing kag screening sang mga makina sa Mayo 2.
Suno kay Sorbito, ang total registered voters sa Bacolod City ang yara na sa karun sa masobra 398,000.
Nakaligad nga eleksyon, nagdangat naman sa 80 porsyento ang turnout.
Suno kay Sorbito sa Marsa 28 pa maga-umpisa ang campaign period sa local level, gani panawagan sini sa mga local candidate nga magsunod sa election campaign rules agud malikawan ang kaso.
