Ginpaathag ni Senate Minority Leader Alan Peter Cayetano sa iya nga Kontra-SONA kahapon, nga dapat tugutan nga makatambong sa impeachment trial ni Vice President Sara Duterte sanday Sen. Jinggoy Estrada kag Sen. Rodante Marcoleta, nga lunsay yara sa detention facility.
Nagapati si Cayetano nga makabig nga “political prisoners” sanday Estrada kag Marcoleta.
Ini ang iya pahayag sa iya speech sa Senado, isa ka adlaw ang nakaligad matapos ang ikalima nga State of the Nation Address (SONA) ni President Ferdinand “Bongbong” Marcos Jr.
Suno diri, mahimo makapiyansa pa ang mga senador kun wala nangin “weaponized” ang proseso batok sa duha.
Madumduman nga pormal na nga ginbuksan sang Senado ang impeachment trial ni Duterte sadtong Hulyo 7, apang wala nakatambong ang tatlo ka senador kalakip si Senator Ronald “Bato” dela Rosa nga wala na nagapakita sa publiko matapos magpagwa sang arrest warrant ang International Criminal Court (ICC) may kaangtanan sa war on drugs sang nakaligad nga administrasyon.
Pahayag sang Senador, dapat mangin presidente man si Marcos sang oposisyon, indi lamang sa iya mga kaalyado kag nagpanawagan sang patas nga pagtratar sa mga katapo sang minority bloc, kaangay sang ginpahayag sini sa SONA nga presidente ini sang pungsod indi lamang sang iya pamilya.
Ginhinambit man ni Cayetano nga selective justice ang ginapatuman subong sa pungsod.
