May posibilidad nga mag-surrender si Sen. Ronald “Bato” dela Rosa suno kay Atty. Israelito Torreon, kun i-file ang kaso batok sa iya sa nagakaigo nga lokal nga korte sa Pilipinas.
Sa isa ka interview, ginpamangkot ang legal counsel ni Sen. Bato kun posible nga maggwa ukon mag-surrender si dela Rosa sa palaabuton, ilabi na nga natapos na ang ultimatum nga gin-set sang Philippine National Police (PNP).
Suno kay Torreon, ang senador lamang ang makadesisyon kun ini ang magpakita na.
Napamangkot man ang batikan nga abogado kun bala maggwa si dela Rosa pananglitan mag-isyu ang Supreme Court sang temporary restraining order (TRO) tuhoy sa iya nga warrant of arrest nga gin-isyu sang International Criminal court (ICC).
Pahayag sini, si dela Rosa lamang ang makasabat sang pamangkot kasubong man ang makadesisyon diri, apang nagapabilin ang posibilidad nga ini ang magpakita kun magadesisyon na ang Korte Suprema.
Paathag sang abogado, indi luyag ni Senator dela Rosa nga daw kaangay sang ‘manok’ nga basta na lamang dakpon kag dal-on sa The Hague nga wala ginpaagi sa lokal nga korte sang pungsod.
Suno diri, ang hingyo lamang sang kampo ni dela Rosa amo ang proteksyon sang lokal nga korte.
