Nagalaum si Senator Imee Marcos nga makapauli na sa Pilipinas si anay House Appropriations Committee chair Zaldy Co, agud mabuyagyag ang iya nga nahibaluan natuhoy sa flood control scandal.
Suno sa Senadora, nauna na nga nagpahayag si Co sang iya kahandaan nga ipagwa ang mga ginauyatan sini nga impormasyon angot sa natukiban nga korapsyon sa flood control projects.
Ginpahayag naman ni Marcos nga posible yara gihapon ang nasambit nga pugante sa Europe.
Ginpahayag sini nga indi mangin mahapos ang pagpapauli kay Co diri sa pungsod bangud strikto ang Europe ilabi na sa mga kaso sang ‘political oppression.
Sa ulihi, nagalaum si Marcos nga magdesisyon si Co nga magpauli na lang sa Pilipinas agud mabuyagyag ang iya nahibaluan nga impormasyon.
Ginbatikos man niya ang pahayag ni Sen. Panfilo Lacson nga dungan ipaatubang sa Senate Blue Ribbon Committee ang 18 ka sundalo nga nagpakilala bilang mga bagman kun makapauli na si Co Pilipinas.
Suno kay Marcos, mas maayo kun ipatawag na kun sin-o ang yari sa Pilipinas kaangay sang iya pakaisa nga si anay House Speaker Martin Romualdez agud madula na ang mga alegasyon nga ,may ginaproteksyunan ang panel.
