Ginpahanugutan sang Sandiganbayan 5th Division si Sen. Jinggoy Estrada nga temporaryo nga makagwa sa New Quezon City Jail sa Agosto 26 para magpa-X-ray sang iya mga tuhod sa isa ka pribado nga ospital.
Sa resolusyon nga ginpagwa kahapon, Agosto 24, nakasaysay diri nga ginpahanugutan si Estrada nga makagwa sa prisohan alas-11:00 sang aga agud magpaidalom sa medical procedure sa Cardinal Santos Medical Center, ala-1:00 sang hapon.
Ginalauman nga magabalik ang senador sa detention facility sa takna nga alas-3:00 sang hapon matapos ang iya nga appointment.
Kinahanglan man nga updan si Estrada sang security escort samtang yara ini sa gwa.
Nalakip man sa resolusyon nga pagasabton sang senador ang tanan nga galastuhan para sa ospital, medical fees, transportasyon kag iban pa nga balayran.
Nauna na nga ginkumpirmar sang iya nga legal counsel sa Sandiganbayan 2nd Division nga may osteoarthritis sa magkatuhay nga tuhod si Estrada.
Naka-detain si Estrada angot sa mga kaso nga plunder kag graft may kaangtanan sa gin-alegar anomaliya sa flood control projects.
