Nagpanawagan si Senator Robin Padilla sa administrasyon nga unahon ang pagpakay-o sang suplay sang kuryente kag sistema sang pampubliko nga transportasyon sa pungsod antes iduso ang plano nga maglunsyar sang rocket sa kahawaan.
Sa kontra-SONA ni Padilla sa Senado, ginpahayag sini nga dapat mas pasangkaron ang gahum sang mga lokal nga panguluhan sa pagpa-uswag sang mga proyekto sa enerhiya, ilabi na sa mga malagyo nga mga probinsya nga masami maka-eksperyensya sang power outage.
Ginpangabay man sang senador nga mapadasig ang proseso sang pagpatukod sang mga power plant agud masabat ang kakulangan sa suplay sang kuryente sa nagkalain-lain nga bahin sang pungsod.
Ginpropose man ni Padilla ang pagduso sang proyekto para sa bullet train nga maga-angot sa Metro Manila kag Bicol agud mapadasig ang byahe sang mga commuters.
Apisar suportado niya ang plano nga magpalupad sang rocket sa kahawaan sa 2027, ginpahayag ni Padilla nga mas dapat unahon ang mga proyekto nga direkta nga makabulig sa pang-adlaw-adlaw nga pagpangabuhi sang mga pumuluyo.
Samtang, nagpabutyag man ini sang pagsuporta sa Freedom of Information Bill kag sa hagna nga pagdumili sang paggamit sang social media sa mga menor de edad.
