Ginkumpirma ni Senator-Judge Kiko Pangilinan sa Senate Impeachment Court nga opisyal nga nagpabutyag si Sen. Rodante Marcoleta nga luyag sini nga mangin kabahin sa impeachment trial ni Vice President Sara Duterte.
Ang kumpirmasyon ang kasunod sang manifestation ni Sen. Erwin Tulfo nga nagapangabay sang paathag natuhoy sa 16-vote treshold para sa conviction sang isa ka impeachable official kaangay ni VP Sara.
Suno kay Pangilinan, sang nakaligad pa nagpalab-ot sang komunikasyon si Marcoleta agud pormal nga ipahayag ang katuyuan sini nga magpakigbahin sa nagapadayon nga proceeding.
Ginpadala ni Marcoleta ang iya formal request sa Senate President kag sa Presiding Officer agud pahanugutan ang iya nga pangabay.
Ang nasambit nga manifestation ang isa man ka kahigayunan agud maklaro kag madesisyunan sang impeachment court ang isyu nahanungod sa paglakip sa mga senador nga nakapriso, sa mga aktibidad sang Senado.
