Ginpahayag ni Senator Risa Hontiveros nga indi dapat mangin “awkward” sa tunga sang mga senador kag ni Vice President Sara Duterte pananglitan ini ang magtambong sa plenary deliberations sang Senado sa proposed 2027 budget sang Office of the Vice President (OVP), suno kay Sen. Risa Hontiveros.
Ginpahayag ni Hontiveros nga ila ginalauman nga personal nga mag-atubang si Duterte sa plenaryo, kaangay sa ginahimo sang mga lider sa nagkalain-lain nga ahensiya sang gobyerno agud ipakigbato ang ila request nga pondo.
Suno kay Hontiveros, indi lamang ang bise presidente ang ginalauman nga magtambong bangud pareho ang pagsulondan nga ginapatuman sa tanan nga opisyal sang mga ahensya nga ginapaidalom sa pag-usisa sang Senado.
Madumduman nga wala nagkadto si Duterte sa hearing sang Senate Finance Subcommittee sang Oktubre 20, sa diin gin-aprubahan sang komitiba ang proposed P785.2-million budget sang OVP.
Gin-athag naman sang senadora nga wala sang may malapas nga sub judice rule kun mag-attend ang bise presidente sa budget deliberations.
Suno sa iya, magkatuhay nga proseso ang pagtalakay sang proposed budget sa impeachment proceedings.
Ginhatagan pagtamod ni Hontiveros nga katungdanan sang Kongreso nga usisaon sang maayo ang mga gin-propose nga budget sang kada talatapan ukon ahensya bangud kwarta sang pumuluyo ang ginakuhaan sang pondo sang gobyerno.
