Indi pabor si Senador kag presidential aspirant Manny Pacquiao sa plano sang Department of Agriculture nga mag-import sang galunggong ukon marot.
Sang bulan sang Enero, ginpahayag ni Agriculture Secretary William Dar nga napirmahan na ang Certificate of Necessity to Import 60, 000 metric tons of small pelagic fish ukon marot agud nga mapun-an ang kulang nga supply sa first quarter sang tuig 2022.
Ini matapos nahalitan sang Typhoon Odette ang fisheries subsector kag nagnubo man ang fish production bangud sa ginpatuman nga closed fishing season.
Sa KBP presidential candidates forum kahapon, ginpanindugan ni Pacquiao nga indi kinahanglan sang Pilipinas nga mag-import sang isda.
Suno kay Pacquiao, tampa para sa Pilipinas ang importasyon sang isda bangud napalibutan ang pungsod sang dagat.
Sa baylo suno sa senador, dapat nga buligan sang gobyerno ang local fishermen.
Amo man ini ang panindugan sang labor group sa Negros Occidental.
Suno kay Wennie Sancho, secretary-general sang General Alliance of Workers Association, manggaranon ang Pilipinas sa marine resources gani indi na kinahanglan ang imported nga isda.
Suno kay Sancho, dapat ipakigbato sang Pilipinas ang West Philippine Sea bangud mahimo nga diri man mahalin ang marot nga igaimport sang pungsod.
Sa pagtsekyar sang Bombo Radyo sa Libertad Public Market kaina, nagnubo na ang presyo sang marot sa karon kun ipanggid sang nagligad nga semana.
Suno sa fish vendor nga si Marjun Catalan, P160 tubtub P180 nalang ang kilo sang marot subong nga semana nagikan sa P240 nagligad nga semana bangud madamo na sang supply.
Ang supply sang isda nga ginabaligya ni Catalan ang nagikan pa sa banwa sang Hinobaan.
Suno sa fish vendor, nagsaka ang presyo tinalikdan nga semana bangud mabudlay ang panguha sang mga mangingisda.
