Ginhangkat ni Senator Manny Pacquiao si anay Senator Ferdinand “Bongbong” Marcos Jr. sang one-on-one debate kasunod sang indi pagtambong sini sa labing una nga debate nga gin-organisa sang Commission on Elections sang Sabado.
Sang siya ang ginpamangkot kun ano ang nangin pamatyagan sini nga wala niya naatubang si Marcos sa debate, ginpahayag ni Pacquiao nga basi nahuya ang anay Senador sa madamo nga magatambong gani okay sa iya ang magdebate nga sila lamang nga duha.
Gindugang man sini nga iya pagalantawon kun ano ang plataporma ni Marcos kag igalatag man sini ang iya plataporma.
Suno sa Senador, basi may maayo ini nga plataporma nga sobra pa sa paghatag sang trabaho, puluy-an nga libre sa mga pamilya, paghatag sang palangabuhian kag pagpakusog sang ekonomiya.
Si Marcos ang nagaisahanon nga presidential candidate nga wala nagtambong sa Comelec-organized debates sang Sabado.
Suno sa iya tagpamaba, ang kampo ni Marcos ang magapadayon sa ila preferred nga mode sang direct communication sa mga pumuluyo kag mag-engage sa mga ini sa mas personal kag face to face interaction agud madiskusyunan ang matuod-tuod nga mga issues sang pungsod.
