Wala sang “hard feelings” ukon kalain sang buot si Senador Panfilo Lacson kanday Davao del Norte Rep. Pantaleon ‘Bebot’ Alvarez kag sa nabilin nga Davao del Norte Reporma candidates kadungan sang iya nga pagresign bilang chairman kag miyembro sang Partido Reporma kahapon.
Suno kay Lacson, padayunon sini ang iya presidential bid bilang isa ka independent candidtae.
Sa isa ka press conference, ginpahayag ni Lacson nga nadesisyunan sanday party president Pantaleon Alvarez kag party secretary Edwin Juhabib nga magsuporta sang iban nga presidential candidate para sa 2022 elections.
Nagapati si Lacson nga nagakadapat lamang ang iya ginhimo nga tikang bilang paghatag sang honor sa iya prinspiyo bilang isa ka ginrecruit nga miyembro kag standard bearer sang partido kasubong man nga gin-elect bilang chairman.
Sa isa ka statement, ginpahayag ni Alvarez nga ang Partido Reporma ang gina-endorso na sa karun ang presidential candidacy ni Vice President Leni Robredo sa May 2022 elections.
Suno kay Alvarez, nadesisyunan sini nga mag-ilis sang pagasuportahan sang kandidato matapos nabatian ang suhestiyon sang iban nga mga miyembro sang partido.
Nagpasalig naman si Lacson nga indi sini pagbayaan ang mga nakigbahin sa Reporma bangud sa iya adbokasiya batok sa korapsyon.
Sa karun nga siya ang nagapadalagan bilang independent nga kandidato, ginpahayag ni Lacson nga siya ang mas “relieved” kag indi dismayado bangud naanad man ini nga magtrabaho nga naga-isahanon.
Gindugang man sini nga ang iya resignation nagikan sa partido ang indi magaapekto sa funding sang iya kampanya bangud kalabanan sa iya mga resources nga pagagamiton para sa iya bid ang nagikan sa iya mga abyan.
Magapabilin naman nga suportado sang Partido Reporma si Senate President Vicente Sotto III sa iya kandidatura bilang bise-presidente.
