Gin-ako ni Senator Ronald “Bato” dela Rosa kahapon nga kahuya ang rason kun ngaa nagbalik ini sa trabaho kag liwat nga nagpakita sa Senado matapos ang pila ka bulan nga pagpanago sa publiko.
Suno kay dela Rosa, madamo sang importante nga pagaistoryahan sa Senado nga nagakinahanglan sang iya presensya, kalakip na diri ang pagbag-o sang liderato kag ang nagahilapit nga impeachment trial sa tion nga mapadala na ang articles of impeachment sa Impeachment court.
Magluwas diri, ginpahayag man sang Senador nga naapektohan ini sa mga pagbatikos sang publiko natuhoy sa pagbaton sini sang sweldo apisar wala nagasulod sa Senado kag wala nagatrabaho.
Iya ginpanindugan nga indi niya batasan nga magbaton sang bayad nga wala sang baylo nga serbisyo gani nagdesisyon ini nga magbalik na sa trabaho.
Madumduman nga wala na nagpakita sa publiko si dela Rosa humalin pa sang Nobyembre sa diin ginbuyagyag ni Ombudsman Crispin Jesus Remulla nga may-ara na sang warrant of arrest ang International Criminal Court (ICC) batok sa iya may kaangtanan sa madugo nga kampanya kontra illegal nga droga sa administrasyon ni anay presidente Rodrigo Duterte.
Sa karon, yara ang senador sa protective custody sang Senado samtang nagahulat sa desisyon sang Korte Suprema angot sa mga petisyon nga ila gin-file.
