Mahimo makabig na bilang isa ka pugante si Senator Ronald “Bato” dela Rosa matapos ini magbiya sa protective custody sang Senado sang tinalikdan nga semana.
Ginpahayag ni Palace Press Officer USec. Claire Castro nga ini man ang opisyal nga posisyon sang Office of the Solicitor General (OSG) natuhoy sa estado sang senador.
Apang, tanan nga operational matters angot sa posible nga pagpatuman sang warrant ang gintugyan na sa Deparment of Justice (DOJ).
Ginpaathag man ni Castro nga “valid” ang warrant of arrest sang International Criminal Court (ICC) batok kay Sen. dela Rosa.
Samtang, ginbasura sang Korte Suprema ang petisyon ni Dela Rosa nga nagahingyo sang Temporary Restraining Order (TRO) agud punggan ang pagpatuman sang arrest warrant naggikan sa International Criminal Court (ICC).
Sa boto nga 9-5-1 sa ginpatigayon nga special session, ginbasura sang Korte Suprema ang pangabay sang Senador para sa temporaryo nga relief.
Santo sa Korte, napaslawan ang mga petisyuner nga pamatud-an ang ila kinamatarong.
Magluwas diri, ginsikway man sang Supreme Court ang pag-isyu sang status quo ante order batok sa mga respondent kalakip ang Department of Interior and Local Government, Department of Foreign Affairs, Department of Justice, Philippine National Police, National Bureau of Investigation, Bureau of Immigration, Armed Forces of the Philippines, kag ang Criminal Investigation and Detection Group.
Samtang, ginklaro naman sang SC nga gindesisyunan lamang sini ang request for interim relief apang nagapabilin nga wala pa masolbar ang mayor nga isyu nga ginpalab-ot sang mga partido sa ila nga mga pleadings kag mosyon.
