Ginkwestyon ni Senator Bong Go ang timing sang pagpagwa sang warrant of arrest batok kay Vice President Sara Duterte angot sa kaso nga grave threats.
Suno kay Go, makaduluda kun ngaa subong lamang ginpagwa ang warrant apang madugay na nga natabo ang insidente nga ginhalinan sang kaso.
Ginhinambit man sang senador nga kadungan sang pag-release sang warrant ang nagapadayon nga impeachment trial ni Duterte sa Senado.
Nag-ugat ang mga kaso sa nangin pahayag sang bise presidente sang Nobyembre 2024, sang ginsiling sini nga may naka-istorya na siya nga tawo nga ginmanduan niya nga patyon sanday President Ferdinand Marcos Jr., First Lady Liza Araneta-Marcos, kag si anay House Speaker Martin Romualdez kun si Duterte ang una nga mapatay.
Bangud sini, nagpatigayon sang imbestigasyon ang Department of Justice kag sa ulihi nag-file sang kaso nga tatlo ka counts sang grave threats batok sa bise presidente.
Sa pihak sang iya pagkwestyon sa timing sang warrant, ginpahayag ni Go nga nagapati ini nga masarangan ni VP Sara ang mga kaso nga ginapangatubang sini.
Suno diri, naanad na ang bise presidente sa mga kaangay sini nga sitwasyon.
