Aminado ang human rights lawyer nga umpisa pa lamang sang election period, makita na sini nga may problema na si Senator Imee Marcos kun sa diin maga-upod nga partido.
Ini kasunod sang opisyal nga pagbiya sang Presidential sister sa Alyansa Para sa Bagong Pilipinas Senatorial slate, nga suportado sang Marcos Administration.
Sa interview sang Bombo Radyo Bacolod kay Atty Cesar Beloria, si Senator Imee ang may-ara sang alyansa kag nagapakilala nga abyan sang mga Duterte, gani makabig nga hilaw ang commitment sini sa Alyansa.
Paathag sang abogado nga mabudlay kun ang Alyansa ang wala nagahugpong, kag nakapagwa naman sang mga nauna nga pahayag ang Senadora gani ginalantaw nga ini ang naghalin na lamang sa grupo.
Apang indi pa sa karun mapaktan kun ini ang batunon sa Senatorial slate sang pihak nga partido bangod kaangay nga nahitso naman sang mga ini ang ila nga miyembro.
Suno kay Beloria, kun wala sang malumpatan nga partido si Senator Imee, siya ang magapapili na lamang bilang indipendent Senatorial candidate.
Paathag sini nga nakadaog naman sadto ang Senadora bisan nga wala sa partido, apisar pa sa mga isyu sang ila pamilya.
May tyansa man nga ini ang makadaog bangod mahimo nga may supporters pa ini sa kampo sang Marcos kasubong man mahimo mahaylo sini ang iban nga supporters sang Duterte.
Apang ang dako nga pagpanghangkat sa iya amo ang gastos karun nga wala na sang political party.
Ginalantaw ni Beloria nga mahimo gamiton na lamang ni Senator Imee ang iya mga koneksyon, agud mapaambit ang iya mga pangalan sa sample ballots sang mga local officials sa nagkalainlain nga mga lugar.
Paathag sang abogado nga sa eleksyon, dako nga factor ang pondo kag koneksyon.
