Ginakasubo ni Senator Imee Marcos ang makasilidhi nga pagpatay kay Negros Oriental Governor Roel Degamo nga isa sa maayo sini nga abyan.
Suno sa Senadora, magkaupod na sila sadto sang sila ang parehas nga gobernador kag sa pila ka mga proyekto kag inisyatibo sa gobyerno.
Gani ginkalipay sini sang maggwa ang desisyon sang Korte Suprema kag pagkahuman sang provincial budget bangod kaangay nga naga-ayuhan na ang sitwasyon para kay Degamo.
Suno pa kay Senator Marcos, nagaplano man siya nga magbalik sa Negros Oriental sa Marso 29 para kuntani sa paghatag sang ayuda sa mga kababainhan, apang gina-umpisahan palang nila ang listahan sang benepisyaryo, nadula na sa kalibutan ang gobernador.
Importante suno sa Senadora nga madakop ang mga suspetsado kag mapapanabat sa ginbuhat nila nga makasilidhi nga krimen.
Ginalantaw naman sini nga dapat hugtan ang pagbantay sa Bayawan City, Negros Oriental kun sa diin nadakpan ang iban sa mga suspetsado sa krimen bangod dako ang posibilidad nga yara pa sa banwa ang iban nga suspetsado.
