Ginpahayag ni Senator-Judge Pia Cayetano ang importansya sang due process sa impeachment court agud nga matumod kun buksan ang bank records kag financial transactions ni Vice President Sara Duterte kag sang bana sini nga si Atty. Manases Carpio.
Suno kay Cayetano, dapat respetuhon pirme ang kinamatarong sang tagsa ka Pilipino.
Suno sa senadora, wala ini sang ginadampigan sa impeachment trial apang ginpaathag lamang sini ang argumento sang defense team sang bise presidente.
Samtang, kadungan sang oral arguments sa ginahingyo sang prosecution nga nga ipa-subpoena ang tax, AMLC, kag bank records ni Vice President Sara Duterte, nagpahayag sang concerns si Cayetano angut sa exclusionary rule kag ang requested documents ang mahimo makonsiderar nga “fruit of the poisonous tree.”
Nagsabat si House Prosecutor Chel Diokno nga ang argumento sang defense team nga nakasandig sa jurisprudence nga natuhoy sa search warrants, nga suno sa iya, lain man kun ipaangid sa subpoena.
Ginpunto ni Diokno, nga ang request sang prosecution ang nasanto sa standards sang relevance kag materiality kag kinahanglan ang mga dokumento agud matumod kon may yara gid man sang unexplained wealth santo sa nakasaad sa impeachment article.
