Nagpaandam si former chief presidential Legal Counsel Atty Salvador Panelo sa mga Senador nga delikado kag supak sa layi ang plano nga pagbag-o sang threshold para sa impeachment trial ni Vice President Sara Duterte.
Sa interview sang Bombo Radyo Bacolod kay Atty Sal Panelo, sarang lamang mabag-o ang layi paagi sa constitutional convention (Con-Con) kag Constitutional Assembly (Con-As) agud indi na maglabay sa Korte Suprema.
Pahanumdom niya nga nakapagkit sa 1987 Constitution nga two-third votes sang mga Senador ang kinahanglan para sa conviction sang impeacheable official.
Panindugan niya nga ang layi ang indi pwede nga bag-uhon lamang sa desisyon sang mga Senador, kag kun ini ang dayunon, ini ang makabig “grave abuse of discretion” kag sila ang mapasakaan sang kaso.
Dugang pa ni Panelo nga bisan wala ginhambal sadto ni Impeachment Trial Presiding Officer Senator Francis “Chiz” Escudero nga 16 votes ang threshold, ini ang nakapagkit na sa layi.
Ginalantaw ni Panelo nga mahimo wala nakahibalo si Escudero sang iya papel bilang presiding officer ukon mahimo man nga napilitan ini bangod may nagahulat man sa iya nga kaso kun magasupak sa luyag sang mayorya.
Gani ginbatun sini ang proposal ni Senator-judge Erwin Tulfo nga desisyonan na ang angot sa issue sang threshold.
Panindugan ni Panelo nga wala sang problema kun ini ang diskusyunan ukon talakayon sang mga Senador, apang supak na sa layi kun bag-uhon nagid ang numero sang boto nga kinahanglan para sa conviction sa impeachment.
Aminado ini nga luyag sang mayorya nga mabag-o ang threshold kag indi malakip sa isip ang mga Senador nga indi makatambong sa hearing sa pagabasihan sang two-thirds.
Kalakip diri sanday Senator Rodante Marcoleta kag Senator Jinggoy Estrada nga napriso bangod sa plunder charges, Senator Ronald “Bato” Dela Rosa nga nagapanago bangod sa arrest warrant sang International Criminal Court, kag Senator Loren Legarda nga yara sa abroad kag nag-extend sang medical leave.
Apang panindugan ni Panelo nga sarang makaboto ang mga napriso, bangod mahimo nila mapangayo ang transcript of record sa impeachment trial kag matun-an sa sulod sang detention facility.
