Ginaduso ni Senator JV Ejercito ang pagdoble sa bulanan nga social pension sang mga indigent senior citizen humalin P1,000 himuon nga P2,000 agud makabulig sa ila mga galastuhan sa pagkaon, bulong, ikaayong lawas, kag iban pa nga kinahanglanon.
Sa Senate Bill No. 2522, ginpropose ni Ejercito nga amyendahan ang Republic Act No. 11916 ukon ang pagsaka sa P1,000 nga monthly social pension para sa kwalipikado nga indigent senior citizens.
Suno kay Ejercito, indi na supisyente ang nasambit nga balor bangud sa nagapadayon nga pagsaka sang presyo sang pagkaon, maintenance nga mga bulong, healthcare, utilities, kag transportasyon.
Sa idalom sang hagna, pasangkaron man ang definition sang indigent-senior citizen agud malakip ang wala sang pension ukon permanente nga ginakuhaan sang kita, kasubong man ang mga nagabaton sang pension, compensation, ukon financial assistance nga wala nagalapaw sa P10,000 kada Bulan.
Ang Department of Social Welfare and Development (DSWD) ang magatumod kun sin-o ang qualified sa idalom sang nasambit nga proposal.
Kakason man ang current qualification nga dapat “frail, sickly or with disability” ang isa ka indigent senior citizen para makabaton sang social pension.
Lakip man sa hagna ang pag-obligar sa DWSD, sa pag-apruba sang Department of Budget and Management (DBM) kag pagpakig-angot sa mga kaangot nga sektor, nga repasuhon ang balor sang social pension kada duha ka tuig kag magpatuman sang adjustment kun kinahanglan.
