Gin-athag nanday Senators Imee Marcos kag Ramon “Bong” Revilla nga ang mga hagna nga ila ginfile nga na-incorporate sa Senate Bill 1979 ukon ang Adolescent Pregnancy Prevention Bill, ang dako ang kinalain sa version sa karun sang nasambit nga hagna.
Ginkonsiderar sang Senate Committee on Women, Children, Family Relations, and Gender Equality ang SB 651 ni Marcos kag SB 1209 ni Revilla samtang ginadraft ang Senate Bill 1979.
Sa isa ka statement, gin-emphasize ni Marcos nga dako ang kinalain sang SB 1979 sa iya ginpropose nga hagna apang gin-athag nga wala ini sang tinutuyo nga kuhaan sang primordial authority kag guidance ang mga ginikanan.
Suno kay Marcos, sa iya hagna, ang Department of Education, Department of Social Welfare and Development, Department of Health kag bilog nga komunidad ang magabuligay agud mag-assist sa mga ginikanan sang medically accurate, culturally sensitive, nondiscriminatory information.
Samtang, ginpahayag ni Revilla, nga nakalista man bilang principal author sang SB 1979, nga ang sa karun nga version ang ginalakipan sang mga provisions nga wala sa iya orihinal nga hagna.
Nagpromisa ini nga pamatukan ang hagna kun ini ang pagalakipan sang mga provisions nga makatuga sang public concern.
