Ginpatigayon na kaina sang aga ang send-off ceremony para sa mga law enforcement officers nga magabantay sa seguridad sa Masskara Festival 2026, nga maga-umpisa na bwas, Oktubre 1 tubtob 18.
Kun sa diin 2,686 ka PNP Uniformed Personnel ang gin-deploy gikan sa Bacolod City Police Office kag Negros Occidental Police Provincial Office; 98 gikan sa iban pa nga ahensya kaangay sang Armed Forces of the Philippines, Philippine Coast Guard, Bureau of Fire Protection, Bureau of Jail Management and Penology; 314 ka mga force multiplier, 90 ka rescue groups kag personnel sang City Disaster Risk Reduction and Management Office, kag 70 ka traffic enforcers gikan sa Bacolod Traffic and Transport Management Department.
Samtang nagpatigayon man sang blessings para sa mga vehicles kag equipments nga gamiton kalakip ang 65 ka mobile patrol cars, 16 ka fire truck, mobile command center sang CDRRMO, Man Truck, duha ka prisoner transport vehicle, 32 ka motorsiklo, 25 ka ambulansya, 150 ka Civil Disturbance Management (CDM) equipment, 350 ka handheld radio, 350 ka handheld metal detectors, kag duha ka mga Canine Dogs.
Sa mensahe ni Bacolod City Mayor Greg Gasataya, aminado ini nga dako ang mangin papel sang deployment, bangod sila ang magaprotekta sa mga festival goers kag mga propedad.
Suno kay Mayor Greg, may average nga isa ka milyon nga mga tawo ang nagalibot sa ciudad sang Bacolod kada adlaw, samtang masobra 600,000 naman sa gab-i, kag ini ang sa regular nga adlaw lamang.
Ginalauman nila nga magdoble pa ang numero sa selebrasyon sang Masskara Festival 2026.
Importante para kay Mayor Greg nga may preparasyon, samtang pasalig sini ang full support sang City Government.
Pahanumdom sang alkalde sa mga law enforcement officers nga indi lamang ini nga kabigon nga obligasyon, kundi dapat nga magserbisyo gikan sa tagipusuon, sa ila commitment sa public service.
