Pilason ang senior citizen matapos mabungguan ang iya motorsiklo sang isa pa ka motorsiklo nga ginadala sang mag-angkasanay nga hubog sa Luzuriaga-San Juan Street, Bacolod City.
Ang senior citizen ang nagabyahe sa North to South direction, gikan sa San Juan Street padulong sa BREDCO Area.
Samtang ang duha ka hubog ang gikan naman sa Bacolod City Public Plaza.
Sa interview sang Bombo Radyo Bacolod kay Alyas Jocelyn, nakakita sang aksidente, madasig ang padalagan sang duha ka hubog kag medyo indi na tadlong ang banas.
Samtang ang senior citizen ang magatabok kuntani sa intersection, mahimo nga ini ang nakibot gani nagdulog ini sa bahin nga medyo yara pa sa kilid.
Apang bangod sa indi na deretso nga dalagan sang duha ka hubog, nabungguan nila ang motorsiklo sang tigulang.
Ini ang nag-agom sang injuries, partikular na sa iya tiil.
Natumba man sa motorsiklo ang duha ka hubog, kun sa diin natulugan nalang gilayon sa dalan ang backrider bangod sa tuman nga kahulugbon.
Ang driver ang waay man maayo sang samad.
Apang suno kay Jocelyn, nagdangat na sa isa ka oras antes mag-abot ang ambulansya bangod madulom pa sang matabo ang insidente, apang masanag na sang sila ang nakuha sa dalan.
Suno diri, yara sa 20s ang edad sang duha ka hubog.
