Bisan masobra 40 na ka tuig humalin sang ini ang nakagraduate sa kolehiyo kag makapila man ka beses nalagbong sa board exam, wala nadulaan sang paglaom sang isa ka senior citizen sa Bacolod nga mangin isa ka licensed civil engineer.
Ang 61-anyos nga Engr. Renato Sano sang Brgy. Mansilingan, Bacolod City, nagatrabaho sa karon sa Wilkinson Construction, ang nakapasar sa September 2026 Civil Licensure Examination makaligad ang ikalima nga attempt.
Sa interview sang Bombo Radyo Bacolod kay Sano, 1984 siya nag-enroll sa BS Civil Engineering sa University of Negros Occidental-Recoletos apang bangud on-and-off ang iya pag-eskwela, tuig 1992 na ini nakagraduate bangud sa kapigaduhon.
Suno kay Sano, naglawig ang iya pag-eskwela bangud night class ang iya ginakuha agud nga makatrabaho sa construction kun adlaw.
Tuig 1994, nagkuha si Sano sang board exam apang wala ini nakapasar bangud wala siya sang ikasarang nga maggasto para sa review.
Nagkapamilya si Sano kag wala na niya ginkabig nga prayoridad ang board exam bangud kinahanglan niya nga magtrabaho agud masaguran ang pamilya.
Sa karon, si Sano ang may duha ka bata nga licensed civil engineers, isa ka licensed aircraft mechanic kag isa ka BS Mathematics gani ginhatagan niya ang kaugalingon sang tsansa nga makumpleto ang natapusan kag mangin isa ka licensed civil engineer.
Nagkuha si Sano sang board exam sang November 2023, April 2024 kag November 2024 apang wala siya nakapasar gani nakit-an niya ang importansya sang pagreview.
Nag-enroll si Sano sa night review nga nangin preparasyon niya sa board exam sang September 2026 bangud nagatrabaho siya kun adlaw.
Makaligad ang 42 ka tuig halin sang college graduation, nakapasar si Sano.
Suno sa iya, age doesn’t matter sa pagkuha sang board exam.
Luyag man niya nga mainspire ang mga aspiring civil engineers nga indi madulaan sang paglaom bisan makapila na ka beses napaslawan.
