Patay ang senior citizen nga barangay tanod samtang pilason ang siyam ka tuig nga bata nga lalaki matapos nga ginbuno sa sulod sang ila balay sa Kalantas, Abada-Iskay, Brgy. Vista Alegre, Bacolod City kaina sang kaagahon.
Ang 73 anyos nga si Aurelio Rull kag ang bata nga gin-ampon sang iya anak ang nagatuparay sa hiligdaan sang nabuksan sang ila kaingod balay ang ila puluy-an matapos nga nakabati sang singgit ni Rol mga alas-3:00 sang kaagahon.
Naga-ungot pa ang kutsilyo sa natuo nga bahin sang ulo ni Rull samtang dako naman nga pilas sa ulo ang naagom sang bata.
Suno sa isa ka kaingod sang biktima, nakabugtaw ang asawa sini bangud nakabati sila paghibi sang siyam ka tuig nga bata kagpagsinggit sang tabang ni Rull gani gilayon man ang mga ini nagpadulong sa balay sang biktima.
Nagpanawag pa sila sa balay apang sirado ang pwertahan kag wala sang nagasabat.
Ginbuksan nalang nila ang pwerta kag nakita nila ang mga biktima nga nagahigda nalang kag nagapaligo sang kaugalingon nga dugo.
Suno kay Bernadette De Warang, isa sa mga kaingod sang biktima, ginpukaw lang siya sang ila man kaingod agud nga pahibaluon sa natabo sa Barangay Tanod kag sa siyam ka tuig nga bata.
Suno kay De Warang, ginhingagaw nila dala sa ospital ang bata bangud nagaginhawa pa ini.
Nakita man sini nga naga-ungot pa ang kutsilyo sa liog ni Rull samtang dako naman nga pilas sa ulo ang naagom sang bata.
Ginalantaw man sini nga indi pagpangawat ang motibo sa krimen bangud wala man nagailinukay ang mga gamit sa sulod sang balay.
Ginpahayag man sang mga ini nga ang amay sang bata ang napriso sa Muntinlupa.
Ginlaragway sini nga wala sang gamo ang Barangay Tanod kag wala man sila sang nahibaluan nga naka-away sini.
Ginlaragway sang magulang sang siyam ka tuig nga bata nga wala sang gamo kag mabuot nga klase tawo ang biktima kag ginakabig naman nila nga isa ka amay.
Suno kay Faith Bautista, ginpahayag sini nga ginpahibalo lang sila sa natabo sa ila manghod kag sa Barangay Tanod.
Ang iloy lamang nila ang nagkadto sa balay sang biktima agud lantawon ang natabo sa manghod matapos nga magpangayo sang bulig ang ila
Nakita man sang iloy sini nga madamo na sang dugo ang salog sang nabuksan ang balay.
Suno kay Bautista duha lang ang 73 anyos kag siyam ka tuig nga bata ang nagapuyo sa balay.
Tuman ang hilibion sini bangud wala man ini sang nahibaluan nga kontra sang ginabakig nila nga amay nga brutal siya nga patyon.
Ginpakigbahin man sini nga brain dead na ang manghod santo sa mga doktor.
Ini ang nakaangkon sang pilas sa nawala kag tuo nga bahin sang ulo nga nagdangat sa utok sini, kag tatlo pa ka mga pilas sa iya mga butkon.
Samtang, ginpahayag sang Punong Barangay sang Barangay 8, nga nangin Barangay Tanod sa sulod sang siyam katuig si Aurelio Rull.
Suno kay Barangay Chairman Joan Magalona, mahipos nga tawo si Rull kag wala na sini ginapareport ang barangay tanod humalin sang nagkapandemya bangud sa consideration.
Mahipid ini nga tawo kag nakacomplete uniform ang biktima sa tion nga may meeting.
Ginakasubo man sini ang natabo sa biktima kag ginapanawagan ang naghimo diri nga magsungka kag atubangon ang krimen nga nahimo sini.
