Patay ang isa ka wala pa makilala nga senior citizen nga lalaki matapos malumos sa isa ka beach sa Barangay Punta Taytay, Bacolod City.
Suno sa imbestigador sang Bacolod Police Station 9 nga si P/Cpl. Roland Abong, nakabatun sila sang report nga may nalunod alas-12:40 sang udto kahapon sa Villarosa Beach Resort sa Barangay Punta Taytay.
Nahibaluan nga ang biktima ang nasapwan lang sang duha ka mga kabataan gani ini ang ila gindala sa takas.
Gilayon naman ini nga gin-CPR sang Life Guard apang wala na ini nagaresponder.
Pag-abot sang Disaster Risk Reduction Management (DRRM) sang syudad, ini ang gindelarar nga wala na sang kabuhi.
Santo sa imbestigasyon sang kapulisan, ang biktima ang may kaupod nga duha ka mga lalaki sang magpaligo sa pihak nga beach resort kag nagsalom ang mga ini sa tunga nga bahin sang lawod.
Apang sang wala na makita ang biktima sa duha sini ka kaupod, nagdisesyon nalang ang mga ini nga magpauli alas-11:00 sang aga tubtob alas-12:00 sang udto.
Nagpanugyan nalang sa bantay nga kun makita ang senior citizen hambalun nalang ini nga nagpauli na sila.
Ginalantaw ni Abong nga nahighblood ang biktima kag nalipungan samtang yara sa dagat bangod wala man ini sang pilas.
Ang biktima ang gindala na sa holy angels funeral homes apang wala pa sang nakaclaim nga pamilya.
Ang biktima ang nakasuksok sang maong nga shorts kag caumoflage nga panapton.
Panawagan ni Abong sa kun sin-o man ang may himata nga senior citizen nga wala pa makapauli nga mahimo man nga tsekyarun sa nasambit nga funeral parlor ang biktima.
