Isa ka 64-anyos nga lalaki nga residente sang Brgy. 35, Bacolod City ang nagtaliwan bangud sa coronavirus disease, Martes sang gab-i.
Sa interview sang Bombo Radyo kay Barangay Kagawad Ruperto Legada, chairman sang barangay health workers sa Brgy 35, Domingo nga adlaw sang ginpadangat sang utod sang nasambit nga pasyente sa barangay nga nagahilanat kag nagalain ang iya pamatyag kag sang Lunes, gilayon nila ini nga ginpacheck-up kag nagpositibo sa rapid test.
Bangud diri, ginpaadmit ini sa Provincial Hospital kag suno kay Legada, maayo pa ang kondisyon sini sang ila gintsekyar sa ospital.
Apang pagka-alas 11:00 sang gab-i sang Martes suno sa kagawad, ginpahibalo sang magulang sini nga nagtaliwan na ang pasyente.
Suno sa iya, may yara sang hapo ang pasyente kag nakaagi man ini tunok sa lansang.
Bangud sa COVID-19 ang gintunaan sang kamatayon sini, wala na ginhamyang ang bangkay sini kag gilayon ginpacremate kahapon sang aga.
Gilayon naman nga gin-isolate kag ginkuhaan sang swab test ang tatlo sini ka mga kabataan kag utod nga upod sini sa panimalay subong man ang kaupod sini sa ubra nga iya nakasalamuha bangud isa ka panday ang pasyente.
Ang puluy-an sang biktima kag sang upod sini sa ubra lang ang ginlockdown bangud suno kay Legada, indi makasarang ang barangay kun bilog nga purok ang isealed-off.
