Patay ang isa ka senior citizen nga nagapahuway sa waiting shed sa banwa sang Valladolid matapos ini ang maarado sang delivery van alas-6:30 kaina sang aga.
Ang biktima ang ginkilala nga si Arnaldo Amboboyog, 62 anyos kag residente sa Barangay Bagumbayan, Valladolid, sang ini ang aksidente nga mabungguan kag gindeklarar nga dead on arrival sang gindala sa ospital.
Sa interview sang Bombo Radyo Bacolod kay Police Major Eric Doronilla, hepe sang Valladolid Municipal Police Station parehas nga nagabanas sang north to south nga dereksyon ang motorsiklo nga ginasundan sang delivery van.
Ang driver sang motorsiklo ang ginkilala nga si Benny Lumanog, 49 anyos, residente sang Barangay Mabini, Cadiz City samtang ang driver sang delivery van ang ginkilala naman nga si Alberto Dela Cruz, 46 anyos, residente sang Barangay Miranda, Pontevedra, Negros Occidental
Suno kay Doronilla, pagdangat sa Bangga Pedion, Barangay Tabao Proper sa banwa sang Valladolid, maga-overtake kuntani ang delivery van sa nawala nga bahin sang motorsiklo.
Apang hinali na lamang nga nagliko man sa wala ang motorsiklo nga wala nagsignal, gani hinali nga ginwarik sang delivery van ang salakyan agud indi mabungguan ang motorsiklo.
Apang ang delivery van ang nagderetso sa waiting shed kun sa diin nagapahuway ang senior citizen.
Sa karun nakahunong sa kustodiya sang Valladolid Municipal Police Station ang driver sang delivery van kag nakahinun-anon naman sini ang pamilya sang biktima.
Ginahulat naman ang pag-abot sang representative sang kompanya sang delivery van, kag ginalantaw ang posibilidad nga may matigayon nga settlement.
