Nakilala na ang tigulang nga babayi nga nabungguan-patay sang Toyota Fortuner sa highway sang Barangay, Silay City sang Biyernes sang kaagahon.
Madumduman nga nabungguan ni Lucel Mapa, 39 anyos kag residente sa Barangay Taculing, Bacolod City ang biktima sang ini ang nagabyahe padulong kuntani sa iya nga trabaho sa pharmacy sa ciudad sang Sagay.
Nahibaluan nga maulanon ang nasambitan nga adlaw kag tuman man ka dulom sang area, samtang nakibot na lamang ang driver nga yara sa tunga sang dalan ang tigulang, gani ini ang iya nabungguan kag napatay.
Sa interview sang Bombo Radyo Bacolod kay Police Major Sarah Villanueva, officer-in-charge sang Silay City Police Station, ang bangkay ang ginkilala mismo sang iya nga bata nga si Norma Sorillo, 77 anyos, balo, kag residente sa Purok Dawis, Barangay 14, Bacolod City.
Suno kay Villanueva, duha ka adlaw na nga nadula ang tigulang gikan sa ila balay sang ini ang nabungguan sang Nobyembre 24.
Pahayag sang bata sini nga malipaton na ang iya iloy kag mahimo ini ang padayun lang nga nagpanglakaton gikan sa Bacolod City tubtob nga nakalab-ot sa ciudad sang Silay.
Sa inisyal nga pagsugilanon, naghingyo lamang sang suporta ang pamilya sang biktima gikan sa nakabunggo para sa galastuhon sa pagpalubong kay Sorillo.
Apang suno kay Villanueva, liwat pa nila nga ipatawag ang duha ka bahin subong nga adlaw agud mafinalize kun magapasaka sang kaso ang pamilya sang biktima ukon ini ang ipaagi na lamang sa settlement.
