Balik prisuhan ang isa ka senior citizen matapos nga liwat madakpan kag makuhaan sang masobra P1million nga balor sang suspected shabu sa joint buybust operation.
Ini ang ginpatigayon sang Bacolod City Drug Enforcement Unit kaupod ang Bacolod City Mobile Force Company, BCPO Chief Investigation Unit, PNP Maritime, Bacolod Police Station 7 kag iban pa sa Purok Arao 2, Brgy. Vista Alegre, ciudad sang Bacolod.
Ginkilala ang nadakpan kay Ronaldo Dorable, 61 anyos, nagaistar sa nasambit nga lugar kag ginapahayag miyembro sang Caunda Drug Group.
Nakuha kay Dorable ang ginabanta 160 grams sang suspected shabu kag may standard drug price nga ₱1,088,000.
Sa interview sang Bombo Radyo Bacolod kay Police Capt. Joven Mogato, pinuno sang City Drug Enforcement Unit, si Dorable ang napriso sa kaso nga illegal gambling sang 2019 kag naka gwa sadtong 2022.
Suno kay Mogato, una ini nga kahigayunan nga nadakpan bangud sa illegal nga druga.
Suno sa CDEU Head, madugay naman ang ila monitoring sa suspek ante natigayon nga madakpan.
Ginpahayag man nga ang suspek ang nagakuha sang supply sang illegal nga druga sa gwa sang ciudad kag personal man ini nga nagadeliver sa iya mga customer kag may yara may yara man sang nagakadto sa iya mismo agud nga magbakal.
May lead naman ang mga kapulisan kun sa diin ini nagakuha sang supply sang illegal nga druga.
Magapangatubang na ini sang kaso nga paglapas sa RA 9165 ukon Comprehensive Dangerous Drugs Act of 2002.
