Patay ang senior citizen nga tricycle driver matapos nga nabungguan sang truck van sa National Road, Barangay III- Poblacion, Pontevedra, Negros Occidental kahapon sang kaagahon.
Ginkilala ang biktima kay Paterno Belleza, 67 anyos, kasado, driver kag residente sang Purok Casiana, Mandalagan, Bacolod City.
Samtang ang driver sang van ang ginkilala kay Rex Quibrantar, 46 anyos, kasado kag residente sang Burgos St., Hinigaran, Negros Occidental.
Sa interview sang Bombo Radyo Bacolod kay Police Major Romulo Gepilango, hepe sang Pontevedra Municipal Police Station, ang truck van ang halin sa ciudad sang Bacolod padulong sa banwa sang Hinigaran, apang pag-abot sa lugar sang insidente nadulaan sang control si Quibrantar kag nabungguan sini ang tricycle nga ginamaneho ni Belleza.
Bangud sa impact nakaagom sang madamo nga samad si Belleza kag gindala pa sa ospital apang gindeklarar nga dead on arrival.
Nadalahig man ang payag sa higad sang dalan nga ginabaligyaan sang prutas.
Yara sa karun sa kustodiya sang Hinigaran Municipal Police Station ang truck driver kag natalana nga magpangatubang sang nagakaigo nga reklamo.
