Patay ang isa ka senior citizen nga number one sa drugs watchlist sang mga kapulisan sa ciudad sang Victorias matapos gintiro sang mga suspetsado nga nagaangkasanay sa motorsiklo sa Angeles St., Canetown Subdivision, Barangay 19-A, Victorias City, pasado alas-6:00 kaina sang aga.
Ang biktima nga si Danilo Toreña nga residente man sang amo nga lugar ang nagasakay sa motorsiklo sang ini ang gintiro sang mga suspetsado.
Nagikan sa tindahan ang biktima sang ini ang gintupungan sang mga suspetsado kag gintiro sa ulo nga nagresulta sa gilayon niya nga kamatayon.
Sa interview sang Bombo Radyo kay Police Lt. Col. Eduardo Corpuz, hepe sang Victorias City Police Station, pila ka motibo ang ginalantaw nga rason sa krimen.
Santo sa rekord sang Victorias City Police Station, naaresto na sadto si Danilo Toreña sa buybust operation sang tion nga si Police Lt. Col. Santiago Rapiz pa ang hepe apang wala ini mapasakaan sang kaso sa wala pa mahibaluan nga rason.
Santo sa ila nga monitoring, indi affiliated sa bisan ano nga drug group sa probinsya apang number one man ini sa drug watchlist sang Victorias City Police Station bangud nadakpan ini sa buybust operation.
Madugay naman nga ginaengganyo sang mga otoridad ang pamilya ni Toreña nga isungka na ini sa otoridad apang wala ini natigayon.
