Patay ang isa ka senior citizen samtang lima ang pilason matapos mabungguan sang isa ka SUV ang isa ka Ceres Liner Bus sa Purok Saging, Brgy. Poblacion 2, Sagay City kahapon sang hapon.
Sa interview sang Bombo Radyo kay Police Chief Master Sergeant Leandro Juarez, imbestigador sang Sagay City Police Station, nagabyahe padulong sa Bacolod City ang ceres bus nga ginamaneho ni Ramonito Bagayo, 38 anyos kag residente sang Escalante City sang makit-an sini layo pa lamang ang Ford Everest nga ginamaneho ni Dr. Charlotte Macasling, 42 anyos, isa ka dentista sa Escalante City Health Office kag residente sang nasambit nga ciudad, nga nagakin sa opposite nga direksyon kag nagabalang-balang ang agi gani nagdulog ini.
Suno kay Juarez, natulugan si Macasling samtang nagabyahe rason kun ngaa naagaw ini ang lane sang ceres bus kag nagresulta sa head-on collision.
Bangud sa kakusog sang impact kag sa posibilidad nga wala nakasuksok sang seatbelt ang iloy ni Macasling nga si Asunsita Brion, 77 anyos, gindeklarar ini nga dead on arrival.
Pilason naman si Macasling kag ang isa pa nga kaupod sini sa salakyan nga si Jessa Mae Nicos.
Samtang, suno sa hepe, sa napulo ka mga pasahero sang ceres bus, tatlo ang nakaangkon sang minor injuries.
Sa karun yara sa kustodiya sang Sagay City Police Station ang duha ka salakyan para sa dugang nga verification.
Samtang, sa Victorias City naman, duha ang patay matapos makabunggo ang motorsiklo sa Ceres bus kagab-i.
Sa impormasyon nga nakuha sang Bombo Radyo, nagaangkasanay sa motorsiklo sanday Earl Sorilla, 21-anyos sang Barangay 6, Victorias City; kag Richard Christian Casin, 39-anyos, kag residente sang Barangay 7.
Padulong ang Ceres bus sa ila terminal sa Barangay 1 sang nagbunggo diri ang motorsiklo sa Osmeña Street, Barangay 13, Victorias City.
Bangud sa patal nga mga pilas, gilayon nga ginbawian sang kabuhi ang duha.
