Patay ang 64-anyos nga lalaki matapos ginkastigo kag ginbuno sang duha ka hubog sa nabukid nga bahin sang Barangay Maytubig, banwa sang Isabela, sang Martes sang hapon, Hunyo 16.
Ginkilala ang biktima nga si Ponciano Bartolo, 64-anyos, isa ka laborer kag residente sa nasambit nga lugar samtang ang mga suspetsado naman amo sanday Jonel Gandula alyas “Pirot” kag Jay-r Sagino.
Sa interview sang Bombo Radyo Bacolod kay Police Major Joseph Partidas, hepe sang Isabela Municipal Police Station, luyag lang kuntani sang biktima nga magpadulong sa ila uma kag kuhaon ang ginlawig nga baka sang masugata sini ang duha ka lalaki nga ginapatihan yara sa impluwensya sang makahulubog nga ilimnon kag hinali lang nila ginkastigo si Bartolo sa wala matumod nga rason.
Suno kay Partidas, ginkuha ni Sagino ang talibong sang biktima kag ginbuno ini sang makapila ka beses.
Nakaangkon ini sang patal nga pilas sa dughan kag likod nga gintunaan sang iya kamatayon.
Sa karon, at large pa ang suspek samtang nagapadayon naman ang imbestigasyon sang kapulisan kag ginadihon na ang pagfile sang complaint batok sa mga suspetsado.
