Patay ang isa ka senior citizen matapos nga gintiro sang abyan sini mismo sa Purok Mahogany, Barangay Bagong-Silang, banwa sang Salvador Benedicto, Negros Occidental, sang Disyembre 19, alas- 7:00 sang gab-i.
Ang biktima ang ginkilala nga si Felix Cabuguas, 62 anyos, kasado samtang ang suspetsado naman ang ginkilala nga si Esmeraldo Hilongos, 58 anyos, lunsay mga residente sang nasambit nga lugar.
Sa interview sang Bombo Radyo kay Police Major Rey Tolosa Jr, hepe sang Salvador Benedicto Municipal Police Station, magkaupod ang duha samtang naga-inom sang makahulubog nga ilimnon apang may nagluntad nga argumento sa tunga sang mag-abyan.
Nagtindog ang suspetsado nga magpauli na kuntani apang hinali lang ini nga naggabot sang calibre 45 kag gintiro ang biktima.
Nag-agom sang igo sa abaga ang biktima nga gintunaan sang iya kamatayon samtang ang suspetsado naman ang gilayon nga nalagyo.
Sa hot pursuit operation nga ginpatigayon sang Salvador Benedicto Municipal Police Station kaupod ang 79th Infantry Battallion, natigayon nga naaresto ang suspetsado.
