Patay ang 69 anyos nga lalaki matapos mabungguan sang ambulansya nga may dala nga pasyente kapin alas-5:00 kahapon sang aga sa Sitio Nasub-ong, Barangay Caradio-an, Himamaylan City.
Ang biktima ang ginkilala nga si Jose Vallar, samtang ang driver naman sang ambulansya amo si Leo Jaruba, 62 anyos, residente sang Barangay Talaban, Himamaylan City.
Sa interview sang Bombo Radyo Bacolod kay Police Lt. Allen Grace Loreno, administrative officer sang Himamaylan City Police Station, ang biktima ang nagabakero sang karbaw kag nagatabok sa dalan sang natalupangdan ni Vallar ang suga sang ambulansya.
Ang ambulansya ang nagabyahe padulong sa Bacolod City kag may dala nga pasyente.
Ginalantaw ni Loreno nga bangod sa masilaw, sala ang pagbanta sang biktima sa labayan sang ambulansya, gani siya ang nag-atras agud kuntani maglikaw apang ini ang nalab-ot.
Sa imbestigasyon, kun nagpadayun lang kuntani sa paglakat ang biktima kag nagsunod sa iya karbaw ini ang wala madalasa sang ambulansya.
Bangod sa impact, malayo ang ginlabugan sang biktima.
Wala man sang makita nga pilas sa lawas sang biktima apang bangod sa severe head injury ini ang ginbawian sang kabuhi sa ospital.
Narelease naman ang driver sang ambulansya kag ini ang may-ara na sang amicable settlement sa bata sang biktima.
