Patay ang isa ka senior citizen matapos nga mabungguan sang motorsiklo sa Araneta St. Barangay Tangub, Bacolod City.
Ang biktima ang ginkilala nga si Josefina Antipuesto, 85 anyos, residente sang Saint Vincent sa nasambit nga Barangay, samtang ang suspetsado naman amo si Willy Pahilanga, 46 anyos, residente sang Purok Kalubihan, Barangay Mahilum, siyudad Bago.
Sa interview sang Bombo Radyo kay Police Staff Sergeant Celerino Arollado, Traffic Investigator sang Police Station 8, nagabyahe padulong sa naaminhan nga direksyon si Pahilanga sang hinali nalang nagtabok si Antipuesto.
Bangod nga yara sa blind spot ang motorsiklo wala na ini makahingagaw nga maglikaw kag madulom kasubong man madamo sang tanom ang area amo nga wala sini nasiplatan ang senior citizen.
Gindala pa sa ospital ang biktima apang gindeklarar nga dead on arrival.
