Dead on the spot ang senior citizen nga lalaki nga nagamaneho sang motorsiklo matapos nabungguan sang ceres bus, kahapon sang udto sa Purok Star Apple, Barangay Luna, Cadiz City.
Ang biktima ang ginkilala nga si Carlos Bilbar, 75 anyos, residente sang Brgy. Bonifacio, Cadiz City, samtang ang driver naman sang ceres bus ang ginkilala nga si Danilo Perrin Jr., 47 anyos kag residente sang Polopangyan, Brgy. Bug-ang banwa sang Toboso.
Sa interview sang Bombo Radyo kay PLt Col Gil John Despi, hepe sang Cadiz City Police Station, parehas ang dereksyon sang byahe sang ceres bus kag motorsiklo apang hinali lang nga nag u-turn ang motorsiklo nga ginamaneho ni Bilbar amo nga wala ini naantispar ni Perrin, ang drayber sang ceres amo nga nabugguan sini ang biktima.
Sa karun si Perrin ang yara sa kustodiya sag Cadiz City Police Station samtang ginahulat pa ang plano sang pamilya sa pagpasaka sang kaso batok sa ceres bus driver.
