Wala pa nakilal-an ang senior citizen nga napatay matapos nabungguan sang salakyan sa Barangay Rizal, Silay City alas-5:30 kahapon sang aga.
Sa interview sang Bombo Radyo Bacolod kay Police Major Sarah Villanueva, deputy chief of police sang Silay City Police Station, nagabyahe ang driver sang Toyota Fortuner nga ginkilala nga si Lucel Mapa, 39 anyos kag residente sa Barangay Taculing, Bacolod City padulong kuntani sa iya trabaho sa Pharmacy sa ciudad sang Sagay.
Gin-athag ni Villanueva nga wala man sa impluwensya sang makahulubog nga ilimnon ang driver apang sa pagdangat sa madulom nga dalan sa Barangay Rizal, nakibot na lamang ini nga yara sa tunga sang dalan ang tigulang.
Bangod naga-ulan, nakita na lamang ni Mapa ang biktima sang malapit na ang iya salakyan gani apisar sa pagtinguha nga makaprino, nalab-ot sini ang biktima.
Gindala pa ang biktima sa ospital apang ini ang gindeklarar na nga dead on arrival.
Suno kay Villanueva, wala pa sila sang identity sa tigulang bangod wala man ini sang bisan ano nga dala nga gamit.
Ginalantaw man sini ang posibilidad nga bangod sa edad, nagamalipaton na ang biktima kag nagpalagyo gikan sa ila puluy-an, nga rasun man kun ngaa yara ini sa tunga sang highway.
Ang biktima ang ginabanta yara sa edad 70 tubtob 80 anyos, yara sa 4-foot-7 ukon 4-foot-8 ang kataason.
Ini ang nakasuksok sang bistida nga duag pula, yellow kag blue.
Ang bangkay ang temporaryo nga ginhold sa ospital tubtob nga may-ara na sang makaclaim nga pamilya.
