Pilason ang isa ka lalaki matapos nga ginluthang samtang nagasakay sa iya nga kabayo sa Sitio Kaliban, Barangay Banogbanog, Isabela, Negros Occidental, pasado alas-7:00 kagab-i.
Ang biktima ang ginkilala nga si alyas Rolly, 61-anyos, single, samtang ang suspek naman ang ginkilala nga si alyas John, yara sa legal nga pang-edaron, lunsay mga residente sa lugar.
Sa interview sang Bombo Radyo Bacolod kay Police Lieutenant Xavier Rama, deputy chief of police sang Isabela Municipal Police Station, nagasakay si Rolly sa iya nga kabayo samtang nagatsekyar sang iya mga baka, sang hinali na lang ini nga gintiro ni John sang makapila ka beses.
Naiguan man ang kabayo nga nagtuga sang kamatayon sini.
Samtang pilason naman si Rolly nga nakaagom sang pila ka pilas sa iya nawala nga paa kag tiil.
Suno kay Rama, posible nga improvised ang gingamit nga armas-luthang, apang may narecover naman sa crime scene nga isa ka cartridge case sang cal .45 pistol gani ginahibalo pa kun ano gin ang gingamit nga armas.
Suno diri, ang ginalantaw nga motibo amo ang hinisaay may kaangtanan sa duta.
Nakagwa man gilayon si Rolly sa ospital matapos nga madapatan sang nagakaigo nga pagbulong.
Sa karon, ginahulat pa kun mapasaka sang kaso ang biktima samtang yara subong sa kustodiya sang kapulisan ang suspek.
