Ginapanawagan sang Secretary General sa General Alliance of Workers Association (GAWA) sa mga Senior Citizen nga magtukod sang grupo nga amo ang maga-adbokasiya sa mga benepisyo sang sektor nga wala ginahatag.
Sa interview sang Bombo Radyo Bacolod kay Wennie Sancho, apisar nga pasakaan sang P1000 ang karun nga P500 nga Senior citizen pension, ini ang halos indi gihapon supisyente bisan sa mga maintenance nga bulong ilabi na kun madamo na sang ginabatyag.
Panawagan ni Sancho nga ini kuntani ang ikonsiderar sang gobyerno, kasubong man ang sa mga benepisyo sang mga person with disability (PWD).
Bilang senior citizen, aminado si Sancho nga siya mismo ang naka-eksperyensya partikular na sa mga kalan-an nga wala na nagahatag sang discount kun take-out, sa panindugan nga sila ang may polisa nga dine-in lamang ang hatagan senior citizen discount.
Suno diri, dapat na nga magbutang sang personnel nga magalibot kun ginapatuman sang husto sang mga establishimento ang polisa.
Paathag sini nga ang senior citizen discount ang isa ka layi, nga indi na dapat nga ipahanumdom.
Apang bangod madamo sang wala nagatuman, nagapanawagan si Sancho kay Bacolod City Mayor Alfredo “Albee” Benitez nga ini ang tsekyaron, bangod magluwas sa mga restaurant, ginpahayag pa ni Sancho nga may-ara man sang Chinese Drug Store nag wala nagahatag discount.
Panawagan sini sa Office of the Senior Citizen sa Bacolod City, kag tanan nga mga Senior Citizen nga I-activate ang organisasyon nga maga-advocate sa pagdemand sa gobyerno sa kung ano ang nakapagkit sa layi.
Pabor man ini nga dulaon na lamang ang booklet sang mga senior citizens bangod kalabanan sa mga ini ang malipaton na.
