Bilang isa ka bata, nagapati ang senior high school graduate nga indi magtindog ang isa ka balay kun wala sang haligi.
Sa interview sang Bombo Radyo kay Aldrich Marcelino, Valedictorian sa Handumanan National High School, apisar nga may sakit ang iya amay, nagtinguha ini sa gihapon nga makatrabaho sang iya masarangan para masuportahan ang pamilya.
Suno diri, bisan pa nga ang iloy sini ang nagdisiplina sa ila nga lima ka mag-ululutod samtang ang amay nila nagatrabaho, apang kun sa tion nga ang amay na sini ang maghambal kag maakig, gilayon na lamang sila nga nagasunod.
Nakita man sini sa iya amay kun ano ka bug-at ang responsibilidad sini, amo nga bilang pinakamagulang nga lalaki sa pamilya, suno kay Aldrich, samtang nagadako ini, nabatyagan naman sini ang ginatawag nga responsibilidad sang isa ka lalaki.
Samtang, ginsaysay man sini ang una nga tion nga nakita sini nga naghibi ang iya amay sang napatay ang iya nga lolo nga bug-at para sa isa ka amay, ang madulaan man sang amay.
Nahibaluan man sini nga sadto pasaway ang iya amay, apang sang nag-abot na ang magulang sini, nagbag-o ang iya amay bangod nga may responsibilidad na ini nga gina-atubang.
Suno kay Aldrich, bangod nga nangin maayo ang iya amay, wala ini nanamian sa mga amay nga nagapalagyo sa ila responsibilidad nga wala man lang nagadumdum sa asawa kag bata sini.
Mensahe ni Aldrich, kun ano ang ihambal sang ginikanan, dapat nga pamatian bangod sila ang una na nga nakaesperyensya mangabuhi.
