Ginakalipay sang chairman sang Sentrong Samahan ng mga Tsuper at Operators Negros (SSTONE) nga gin-extend tubtob sa bulan sang Disyembre ang prangkisa sang mga traditional jeepneys.
Sa interview sang Bombo Radyo kay Albert Villanueva, ginpahayag sini nga daw nabunutan ang mga ini sang tunok sa ila mga problema bangud una na nga ginpahayag nga tubtob na lamang sila sa bulan sang Marso.
Suno kay Villanueva, kampante naman ini nga ang Bacolod City Government ang wala nagapabaya sa ila ginapakigbato nga palangabuhian.
Suno sa iya, bangud sa bulig sang LGU, nagapadayon sila sa pagbyahe apisar nga wala sang prangkisa bangud nakit-an man sang gobyerno nga ang ciudad kag mga commuters ang maapektuhan kun magkulang ang units sang salakyan nga nagabyahe.
Subong suno diri, natigayon na nga ginaprocess ang ila renewal ukon provisional authority paagi sa LGU.
Indi naman sila mag-intra sa ginapatigayon nga strike sa Manila bangud wala man sila ginapabay-an sang local government.
Nagapasalamat man ini nga nalab-ot na sa Senado ang modernization program kag pabor sa patigayunon nga imbestigasyon.
Suno kay Villanueva, paagi diri, mahibaluan kun ngaa amu ini ang balor kag unit sang salakyan ang ginaduso nga madula ang trademark sang jeepney sa Pilipinas.
Nagapasalamat man ini kay President Ferdinand “Bongbong” Marcos Jr. sa pahayag sini nga pahanugutan ang traditional jeepneys nga magbyahe basta magcomply lamang sa modernization program.
Suno sa iya, kaangay man sini ang ila gusto nga irehabilitate kag islan lamang sang engine ang ila mga units kag indi lamang pagpiliton nga magsulod sa kooperatiba.
