Indi magpakigbahin sa untat byahe sa Lunes ang Sentrong Samahan ng Tsuper at Operators – Negros (SSTONE) kag Federation of Bacolod City Drivers Association (FEBACDA).
Madumduman nga ginkumpirmar sang pinuno sang Bacolod Alliance for Commuters Operators and Drivers (BACOD), isa ka transport group nga nagpatigayon sila sang presscon kahapon para sa ila plano nga pagprotesta sa atubang sang Bacolod City Government Center sa Lunes, Mayo 8, agud nga ipabutyag ang mga problema nga ginapangatubang sang mga traditional jeepneys.
Suno kay Rody Agsam Cathedral, mapatigayon sila kaupod ang NBTC, kag UNDOC sang untat biyahe sa Lunes bangud sa indi pagrenew sang Land Transportation and Franchising and Regulation Board 6 sang ila mga special permit.
Sa interview sang Bombo Radyo kay Albert Villanueva, chairman sang SSTONE, wala nalakip sa agenda sang ila federation kag sang FEBACDA ang untat byahe kag wala ini sa ila plano apisar nga nagapakig-angot man sa iya si Diego Malacad, secretary general sang United Negros Drivers and Operators Center (UNDOC).
Suno kay Villanueva, sila ang nagahulat sa schedule sang LTFRB kun san-o sarang nga makigkita bangud sila ang magatambong kaupod ang local government unit.
Suno diri, may yara sang gintukod ang LGU nga traditional technical committee.
Suno sa iya, maathag naman nga extended ang prangkisa sang public utility jeepneys tubtob sa Disyembre 31 kag bangud ang modernization programa ang programa sang national government, magadepende sa gihapon sa Land Transportation Office (LTO) kun ila ini updan ukon protektahan ang mga yara sa local.
Suno kay Villanueva, ila igahatag sa LGU ang problema sa transport sector bangud ang LGU amu ang magasolbar sini.
Suno sa iya, ila ginarespesto ang sistema sang iban nga transport groups agud magpangita sang solusyon sa problema apang sa bahin sang SSTONE kag FEBACDA, indi sila magpakigbahin sa transport strike sa Lunes.
Suno diri, para sa ila, ara na ang solusyon kag implementasyon na lamang ang kulang.
Kun wala implementasyon, sila ang magapadulong sa LGU agud ini ang pungkuan bangud sila sa gihapon ang maapektuhan kun ila pilion ang gamo.
