Nagpabutyag sang kahangawa ang sepultorero sa Burgos Public Cemetery bangod sa magabok kag nagalitik na nga pader sang patyo.
Nahibaluan nga lima ka tuig na nga wala ginapalubngan ang nasambitan nga sementeryo bangod ini ang overcrowded na.
Sa interview sang Bombo Radyo Bacolod kay Presto Tikar, madamo sang nagalabay sa dalan, kag tuman ka delikado ang pader nga sarang marumpag ano man nga oras.
Ginpa-utdan man sang ciudad ang kahoy nga nagabunggo sa pader, apang kaangay nga ginatulok lamang ang sitwasyon sang magabok na nga pader sang Burgos Public Cemetery.
Ginsulod sang Bombo News Team ang sitwasyon sa sulod kag nakita nga nagadulot ang kahoy sa pader rasun nga ini ang nagacrack.
Tuman naman ka siot sa sementeryo nga nagtuga man agud ini ang bansagan nga “ghost cemetery.”
Naabtan sang Bombo News Team si Alyas Josephine, nga residente pa sa Brgy Patag, Silay City nga nagabisita sa iya minatay.
Suno diri, nalubong sa sementeryo ang iya bana, bata kag magulang.
Ginkwestyon man sini si Tikar kun ngaa wala ginalimpyohan ang patyo, apang depensa sini nga sila ang wala ginaswelduhan sang ciudad.
Kumpormi man ini nga ang ciudad ang magpadala sang mga tawo nga magatinlo sang sementeryo, ilabi na nga sila ang nakadakop na sang duha ka man-og bangod sa kasi-ot sang Burgos Public Cemetery.
Ginkumparar pa ni Josephine ang sementeryo sa Silay Public Cemetery nga suno sa iya ginaseguro sang alkalde nga matinlo.
Hingyo sini nga kuntani ireklamo na kay Bacolod City Mayor Greg Gasataya ang problema sa napabay-an nga sementeryo agud mahimuan sang tikang.
