Gin-athag sang Administrator sang National Electrification Administration nga one-year emergency power supply agreement lamang ang sa karun kontrata nga nagahatag sang bastante nga supply sang kuryente sa Siquijor.
Madumduman nga kahapon, madinalag-on nga napatigayon ang ceremonial switch-on ceremony para sa 17.8MW (Megawatt) Diesel Power Plant nga ginpangunahan ni President Ferdinand “Bongbong” Marcos Jr.
Ini ang nangin solusyon sa pila ka bulan nga power crisis sa isla.
Kun sa diin ang United Power Rental Incorporated, ang nag-install sang tatlo ka diesel-powered generators sa banwa sang Larena, Lazi kag San Juan.
Sa interview sang Bombo Radyo Bacolod kay NEA Administrator Nani Almeda, ang 17.8MW (Megawatts) nga power supply ang tuman ka dako kun ipaanggid sa peak consumption sang Siquijor nga yara lamang sa 9 Megawatts.
Bangod sini, maseguro na ang 24 oras nga bastante nga power supply sa tanan nga banwa sa isla nga ginalakipan sang Siquijor, San Juan, Lazi, Maria, Enrique Villanueva kag Larena.
Suno kay Almeda, sa pagpanguna ni President Ferdinand “Bongbong” Marcos Jr. nahimo nga masolusyonan ang problema kag wala na ginhulat pa ang anom ka bulan nga pasalig sini sa State of the Nation Address (SONA).
Matapos ang isa ka tuig nga kontrata, magapatigayon sang Competitive Selection Process sa masunod nga mangin power provider sa isla.
Pasalig ni Almeda nga sarang gihapon makapasakop sa bidding process ang United Power Rental Inc.
