Ginkilala sang commander sang 302nd Infantry Brigade ang serbisyo nga ginhatag sang duha ka mga intel officers sang Philippine Army nga napatay matapos nga gin-ambush sa Barangay Camindangan, siyudad sang Sipalay kahapon sang aga.
Ang duha ka biktima nga lunsay mga miyembro sang 47th Infantry Battalion intel operatives amo sanday Sergeant Regie Glendro kag Staff Sergeant Ken Camilana.
Suno kay Peña, 18 na ka tuig sa serbisyo ni Camilana kag 16 ka tuig naman si Glendro.
Suno kay 302nd Infantry Brigade Commander Brigadier General Leonardo Peña, madamo na sang naagyan ang duha sa kalawigon sang ila trabaho.
Pahayag ni Pena, naglakat ang duha para magpartisipar sa isa ka community support program sa pagsustinir sang katawhayan sa Barangay Camindangan sang gin-ambush sang ginapatihan mga miyembro sang NPA nga nagasakay sa motorsiklo.
Ginalantaw nga ini ang pamaagi sang New People’s Army sa pagbalos kag pagpakita nga may yara sila sang pwersa matapos nga may napatay man sila nga miyembro sa nauna nga engkwentro tinalikdan nga semana.
Mensahe ni Peña sa mga NPA members nga indi tanan nga oras ang yara sa ila, bangud padayon sa karun ang pagtrabaho sang militar.
Apang kun gusto sang mga sini nga magsurrender, yara ang armed forces sang Pilipinas sa pag-akomodar sa ila.
Iya man ginpahayag nga para sa kaayuhan ang sang komunidad ang ginatrabaho nanday Glendro kag Camilana antes sila ginpatay.
