Nagapadayon sa karun ang negosasyon sa tunga sang Central Negros Electric Cooperative (CENECO) kag Punong Barangay Punong Barangay Rosinie Distrito sang Singcang Airport, Bacolod City tuhoy sa posible nga settlement may kaangtanan sa pagpangawat sang kuryente para sa barangay hall.
Madumduman nga sang tinalikdan nga Marso, ginpasakaan sang CENECO sang kaso administratibo si Punong Barangay Rosinie Distrito kasubong man ang barangay treasurer kag barangay secretary sang Singcang Airport bangud sa pagpangawat sang kuryente para sa barangay hall.
Magluwas sa graft charges, ang CENECO ang nagpasaka man sang criminal case nga violation sang Anti-Pilferage Act of 1994 sa nasambit nga mga opisyal sang Barangay Singcang Airport.
Sa interview sang Bombo Radyo kay Atty. Marcus Vaflor, legal counsel sang CENECO, nagapadayon sa karun ang negosasyon sang duha ka bahin para sa posible nga amicable settlement.
Suno diri, ginrefer sang Office of the Ombudsman ang kaso ni Distrito sa Office of the City Prosecutor apang magadepende pa ini sa mangin settlement sang duha ka bahin.
Suno kay Vaflor, posible nga magpangayo sang balayran ang CENECO sa naconsume nga kuryente sang barangay nga nagdangat na sa kapin P5.6 million kag may mga charges man ukon penalty nga dapat bayaran.
Sa karun nagahulat pa ini sang go signal nagikan sa management sang electric cooperative kun igahold ukon indi nalang pagpadayunon ang pagfile sang kaso.
Suno diri, kun may settlement na ang duha, indi na lamang magfile sabg kaso ang CENECO apang kun wala, ini ang madayon.
